Uppselt á Iceland Airwaves 2007

Um hádegisbilið í dag varð uppselt á tónlistarhátíðina Iceland Airwaves 2007. Er þetta fjórða árið í röð sem selst upp á hátíðina, sem nýtur sívaxandi vinsælda á erlendum vettvangi.

Yfir 200 hljómsveitir og listamenn koma fram á Iceland Airwaves hátíðinni í ár sem stendur yfir í fimm daga, frá miðvikudeginum 17. október til og með sunnudeginum 21. október. Hátíðin fer fram á níu aðal-tónleikastöðum í miðborg Reykjavíkur, sem eru; Listasafn Reykjavíkur - Hafnarhús, Gaukurinn, NASA, Lídó, Iðnó, Organ, Grand rokk, Barinn og Fríkirkjan í Reykjavík.

Auk þess mun vegleg Airwaves dagskrá fara fram í Norræna húsinu og mærri viðburðir og tónleikar fara fram í plötuverslunum, kaffihúsum og annarstaðar í miðbænum - ásamt hinu árlega Airwaves partýi í Bláa Lóninu.

Ekki verður selt inn á einstaka viðburði á hátíðinni ef frá eru taldir eftirtaldir tónleikar.
Og þá aðeins með húsrúm leyfir, forgangur á armbönd.

• Tónleikadagskrá á Gauknum miðvikudagskvöldið 17. október (1.000 kr)
• Tónleikadagskrá á NASA miðvikudagskvöldið 17. október (1.500 kr)
• Tónleikadagskrá á Barnum alla helgina (1.000 kr / 2.000 kr)
• Tónleikadagskrá á sunndeginum 21. október á Gauknum og Organ (1.000 kr. / 2.000 kr)

Upplýsingar um dagskrá þessara viðburða má finna hér: http://www.icelandairwaves.com/schedule.asp?pageID=21


Meðal þeirra sem koma fram á Iceland Airwaves í ár eru Bloc Party (uk), of Montreal (us), Grizzly Bear (us), Deerhoof (us), !!! (us), Jenny Wilson (se), Trentemöller (dk), The Bronx (us), Buck 65 (ca), The Duke Spirit (uk), The Teenagers (fr/uk), Heavy Trash (us/dk), Lali Puna (de) og Chromeo (ca) ásamt rísandi vonarstjörnum tónlistarpressunar eins og Plants & Animals (ca), Ra Ra Riot (us), Ungdomskulen (no), Computerclub (uk) og Radio LXMRBG (se) - svo eitthvað af þeim tæplega 50 erlendu hljómsveitum og listamönnum sem sækja hátíðina heim séu nefnd.

Sem endranær mun rjóminn af því besta sem um er að vera í íslenskri tónlist vera á boðstólum á Airwaves og ár koma m.a. fram; Sprengjuhöllin, Gusgus, Lay Low, Hafdís Huld, Mugison, múm, Mínus, Ólöf Arnalds, Motion Boys, Jeff Who? Benni Hemm Hemm, Pétur Ben, Seabear, Amiina, I Adapt, Changer, Reykjavík!, Skátar, Singapore Sling, Motion Boys, Fm Belfast, XXX Rottweiler og Jakobínarína.


Icelandairwaves.com